Արհմիությունը ամփոփեց աշխատանքները և նախանշեց հետագա գործունեության ուղղությունները
Ընդանրացնելով անցած հինգ տարիների աշխատանքը, Արհմիության նախագահ Ալբինա Մարտիրոսյանը նշեց, որ չնայած Ընկերության կրած ֆինանսա-տնտեսական դժվարություններին, որոնք ծագել են հաշվետու ժամանակաշրջանում, այդուհանդերձ աշխատողների միջին ամսական աշխատավարձը բարձրացել է 12,8%-ով և ընթացիկ տարվա վերջում այն կհատի 300 000 դրամի սահմանագիծը: Այդ ամբողջ ընթացքում Ընկերությունում հաստիքների կամ աշխատատեղերի կրճատում չի եղել, չի եղել աշխատավարձի վճարման ուշացումներ:
«ՀԿԵ» ՓԲԸ-ում ամուր հիմքերի վրա է դրված սոցիալ-գործընկերային հարաբերությունները Գործատուի և Արհմիության միջև: Հաշվետու ժամանակաշրջանում Կոլեկտիվ պայմանագրով նախատեսված բոլոր սոցիալական պարտավորությունները կատարվել են ամբողջությամբ և ժամանակին:
Մասնավորապես, այդ փաստաթղթի շրջանակներում Արհմիության կողմից կազմակերպվել է աշխատողների և նրանց երեխաների ամառային հանգիստը առողջարարական և հանգստի գոտիներում, ցուցաբերվել է ֆինանսական աջակցություն աշխատողների և նրանց ընտանիքի անդամների բուժման նպատակով, սոցիալապես անապահով աշխատողներին և առաջին դասարան հաճախող երեխաներին:
Արհմիության գործունեության կենտրոնում են եղել նաև աշխատողների աշխատանքի պաշտպանության և պայմանների բարելավման, սոցիալական նշանակության օբյեկտների բարեկարգման և սանիտարա-հիգիենիկ կանոնների պահպանման հարցերը:
Նշվեց, որ Ընկերության տնտեսություններում զգալի աշխատանքներ են կատարվել աշխատողների աշխատանքի պաշտպանության, առողջ և անվտանգ պայմանների ապահովման, արտադրության կուլտուրայի և էթիկայի բարձրացման, սոցիալական նշանակության օբյեկտների պայմանների բարելավման ուղղությամբ:
Այս աշխատանքներում իրենց ակտիվ մասնակցությունն են ունեցել նաև արհեստակցական կազմակերպությունները, հնարավորության սահմաններում աջակցել են հատկապես լոկոմոտիվային բրիգադների հանգստի տների և սենյակների բարեկարգման, արտադրական տեղամասերը անհրաժեշտ գույքով և կենցաղային տեխնիկայով ապահովվածության ուղղությամբ:
Համագումարը Արհմիության հինգ տարվա աշխատանքները գնահատեց բավարար և կազմակերպության ղեկավարի պաշտոնում միաձայն վերընտրեց Ալբինա Մարտիրոսյանին:
«ՀԿԵ» ՓԲԸ Արհմիության նորընտիր ղեկավարը հավաստիացրեց, որ ջանք չեն խնայի պահպանելու կազմակերպության միասնականությունն ու համախմբվածությունը, կշարունակեն գործունեությունը աշխատողների աշխատանքային, սոցիալ-տնտեսական իրավունքների և երաշխիքների պաշտպանության ուղղությամբ: